المتهكرن
الهاكر (Hacker) : هو شخص مبرمج صاحب عقلية جبارة في البرمجة وكتابة الأوامر …
فمثلاً في أشخاص اخترقوا مواقع قوية مثل المخابرات الأمريكية أو أنظمة التشغيل …. أذكر لكم قصة ويندوز فيستا في بداية طرحها …صرحت الشركة (ميكروسوفت) بأنها -بما معنى التصريح- تتحدى أي شخص يخترق نظامها الجديد الآمن ويندوز فيستا ….. فرجعت لهم الفاجعة بعد أسبوع بنسختهم المخترقة …. يمكن كان وراها عائد مادي أو غيره … أو كان المبتغى من وراء الاختراق هو الشهرة …. وفعلاً بيستحق عليها الشهرة .
لكن في عالمنا العربي …. بيجي شاب بعقل طفل (أنا بسميه متهكرن) بيستخدم برنامج متبرمج على أيدي مبرمجين محترفين لإرسال رسائل مزعجة أو اختراق مواقع عادية …… ويتفنن العقل العربي باستخدامها و التطفل على محتويات الأصدقاء أو البنات خصوصاً أو في وقت الفراغ بيتسلى على المواقع الشخصية ….. عشان يشبع النقص الي عنده…. و يتباهى بين أصحابه بأنه قام بإنجاز عظيم واخترق جهاز فلان أو فلانه و شاف محتويات الجهاز أو اخترق موقع انترنت …… يعني إنه مقطع السمكة و ذيلها .
سؤال واحد أحتاج لإجابة عليه : إيش هي المتعة أو الفائدة من اختراق موقع شخصي أو منتدى ؟؟؟
المشكلة إنه بيستخدم برنامج جاهز لعمل هذا التخريب و يا ريته هو الي كتب الأوامر البرمجية …… و اللي بيجلط أكثر إنه بيفتخر بكلمة أنا هاكر 😯 .
قبل فترة متهكرن تركي أخترق موقعي الشخصي اللي موجود فيه صورتي و دفتر الزوار و اتصل بي و معلومات ما بتأذي حدا ….مغير الصفحة الرئيسية بس وحاطط لي علم تركيا و صورة جمجمه …. لا و اللي بيضحك بالموضوع إنه حاطط لي إيميله (قال يعني إذا بدي إشي منه أروح أحكي معه) ….. المهم آمنا بالله و رجعت الملف الأساسي و تمام التمام ….. بعدها بأكم من يوم لقيت رسالة من الموقع واحد باعتلي رساله باسم (KSA.HaCkEr) وبيحكي لي إنه لقي ثغرة خطييييييييييرة بالموقع و نرجو منك الترقيه إلى الإصدار الأحدث ….. طبعاً أنا هنقت من كلمة الإصدار الأحدث 8O….
طبعاً الموقع مبيّن عليه شغل HTML و JAVA SCRIPT و PHP من وين جاب ترقيه إلى إصدار أحدث …. (هذا دليل على إنه مش فاهم إيش الطبخة و مسمي حاله هاكر) …. 🙄
طيب بلاش موقعي …
اليوم عرفت من مدوّنة الأخ مكس إنه منتدى عرب وورد بريس …. منتدى خدمي تعليمي ما فيه لا تطرف ديني و لا سياسة …. واحد مسمي حاله (Saudi Arabia Hacker) مخترق المنتدى ….. طيب ليش يعني ؟؟؟ إيش الفايدة ؟؟؟ إيش سويت بالضبط يعني ؟؟؟
طيب بلاش الأسئلة اللي مالها طعمه
حط حالك بمكاني أو بمكان صاحب المنتدى أو مكان أي صاحب موقع اخترقته (أو بالأصح خربته) إيش موقفك لما تشوف هالشيء متسوي فيك ؟؟؟؟؟
أتمنى أشوفك مرفوع ضغطك و تسب و تشتم ….
كلمة واحدة بس (استخدموا مهاراتكم هذه في ما يرضي الله) …
تحياتي