أنا مش بطل … واجب تدويني
مرر لي أخوي أيمن (MonTexo) هالواجب اللي بيطلع الفضايح وهي إنه الواحد يذكر العيوب اللي فيه ….
أنا راح أذكر اللي هيخطر على بالي …
1- أنا سريع الغضب بشكل فظيع (حتى لو كان الأمر مش بالأهمية لكن ضايقني كثير على طول بعصّب) لكن الحلو بالموضوع إنه الهدوء بيجي كمان بسرعة.
2- بشرب قهوة كثير (ميزانية شهرية للقهوة بس) (كمان موضوعين راح أنزل موضوع عن هوايتي مع العم بارنيز)…
3- النوم و ما أدراكم ما النوم مع سامي … أنا إنسان إذا استلمت خط بالنوم …. صعب إني أصحى بسهولة … يعني يرن الجوال جنبي وهو بيرن مع نفسه … إلا إذا أحد لمسني بصحى على طول …
4- إذا قعدت على الكمبيوتر و اندمجت باشي بسويه وأحد اجى يكلمني أو يطلب مني اشي … بجاوبه بالموافقة … لكن في الحقيقة المُرّة إني ما بكون معاه و لا أخذت منه أي معلومة … بتذكر إنه في أحد حكى معي بس مين هو ما بتذكر…
5- في شغلة كثير مضايقاني (بس هي أوقات حلوة) لما أكون بفكر باشي إني أسويه أو كيف أسويه … بكون ضايع و بتختلط الأمور مع بعض و بيصير مليون شغلة وشغلة براسي.
6- مصرفجي (بالعامية) … يعني بالعربي ماشي على المثل اصرف ما في الجيب بتصير مفلس على طول … 
7- بحب إنه إذا عجبني اشي إني امتلكه بأسرع وقت … ومرات ما بكون قادر إني امتلكه…
8- بالنسبة للأكل … الحمدلله أنا باكل جميع أنواع الأكل (إلا القليل القليل جداً) المهم إني بتعب على بين ما أقرر إني ايش أكل لأنه الأكل اللي بفضله اللي هو الطبايخ و الوجبات الدسمه … الله يعين المدام مستقبلاً (أحد شروط الزواج بتعرف تطبخ جميع الأكلات الفلسطينية (وفي أكلة بالتحديد بس ما هأذكرها هنا)). والله شكلي هأعنس.
9- ملول (من الملل) بشكل فظيع.
10- لساني سليط لما أعصب و أكون في قمة الغضب …
الله يسامحك يا أيمن بس
أنا ما راح أمرره إلا للي حابب إنه يحله
دمتم بود