طبعاً أنا لسه ما انتقلت لا على اللينوكس و لا على على الويندوز الفيستا … باقيين على العهد مع الإكس بي كنت استخدم برنامج الـ (ACDSEE) وكان رائع جداً ولا زال عاجبني … لكن قبل فترة شفت برنامج (3 Picasa Viewer) على جهاز أخوي يوسف … وبجد فتنني وخاصة من عند العم جووجل … المهم ما علينا ندخل بالموضوع…

حاولت إني أنزله مباشرة بس ما لقيته برابط مباشر (الرابط اللي موجود بالموقع مش شغال لحد الآن عند موقع جووجل ولحد الآن ما صلحوا الرابط) المهم إنه موجود على سيرفراتهم عن طريق هذا الرابط.

على فكرة هذا البرنامج مفيد لمستخدمين الويندوز إكس بي لأنه على حسب حكي صاحب مدوّنة إبداع الساهر إنه موجود جاهز في الويندوز فيستا…

فرصة إنه تجربوه

دمتم بود وجوجلة

السلام عليكم ورحمة الله وبركاته

امبارح كتبت بوست وحذفته على طول كنت كاتب فيه عن كثرة التطويرات تبعت الووردبريس قديش إنها مملة … وهذا لأني كنت محدث النسخة قبل سبع أيام تقريباً للنسخة 2.6.5 وامبارح نزلت النسخة الجديدة 2.7 .. فمن الطفش اليوم نزلتها و عدلت الأشياء الي على كيفي ورفعتها بدال النسخة 2.6.5 … منه ترقية للمدونة و منه تضييع وقت و طفش …
بصراحة قعدت تقريباً فوق النص ساعة وأنا أتأمل في المجهود الجبار اللي صار ببرنامج الووردبريس من ناحية لوحة التحكم لأنه هي اللي بتهمني …حاجات كثير أعجبتني والله:

1- الواجهة شفتها صارت كثيييييييير مرتبة عن الأول من ناحية المحتوى كله بطريقة (Toggle)… يعني الي بدك إياه يكون ظاهر بتظهره والي ما بدك إياه بتخفيه.
2- القوائم المنسدلة الي على اليسار. برضو بطريقة الـ (Toggle).
3- طريقة الكتابة و الأرقام مثل ما هو واضح بالصورة كتير مريح للعين..
4- سويت تعديل بسيط شلت القائمة الي على يمينكم و استخدمت فيها خدمات الويدجت الجاهزة الي موجودة من ضمن خيارات الووردبريس. وقعدت أجرب بعض التجارب فيها بجد أعجبتني كثير.
5- خدمة (QuickPress) لكتابة التدوينات على السريع.
6- استخدام أكثر من مكتبة برمجية في نفس البرنامج (هاي النقطة خاصة بالبرمجة ما عمري جربت اني استخدم أكثر من مكتبة لكن من بعدها راح أجرب هاي الشغلة ببرمجياتي).
7- أعجبني كمان لما تصفحت التعليقات كل ما أمرر الماوس على تعليق تظهر الخدمات الإدارية (نشر و حذف و تعيين كسبام …. ) لكل تعليق ومجرد أشيل الماوس عنه تختفي الخدمات … هي سهلة كبرمجة لكن ما بتخطر على البال وقت الشغل.
8- لاحظت فرق كبييييييييييير بسرعة التصفح للوحة التحكم.
9- أغلب التطبيقات الموجودة بهاي النسخة صارت بتقنية الأجاكس.
 10- ملاحظة مهمة أعجبتني جداً جداً جداً …. لما نكتب تدوينة ونسوي معاينة قبل النشر (preview) كانت بالنسخ القديمة يظهر الرابط كالمثال التالي:
(http://www.samiman.net/wp/?p=290&preview=true) يعني ممكن أي حدا يجرب لحد ما يطلع التدوينات الي كمسودات (مش متأكد من الأمن الي هذه النقطة لكن هذا باعتقادي) المهم إنها كانت مضايقاني هاي الشغلة …. وبهاي النسخة حلوها و فكو ضيقتي صار الرابط تبع المعاينة كالتالي:
(http://www.samiman.net/wp/wp-admin/post-new.php?preview=true) يعني صارت المعاينة من داخل لوحة التحكم ما أحد يقدر يشوفها غير الأدمن (صاحب المدونة أو كاتب فيها).

عشر نقط بشكل سريع لكن أكيد في أشياء ما انتبهت لها … أكيد راح أفتح كل رابط وأشوف إيش عاملين بلكي استفدت منها بشغلي …

عن جد رقو مدوناتكم لهذه النسخة … اللي قرأته إنه النسخة العربية ما نزلت …

دمتم بود

جزء من المواقع الي فادتني وخصوصاً بصحيفة سبق الالكترونية .. أتمنى إنها تفيدكم
أغلب المواقع اللي بزورها و بقرأ فيها أجنبية فاللي لغته الانجليزية مش ولابد الله يعينه

http://gscripts.net
http://miniajax.com/
http://www.dhtmlgoodies.com/index.html?page=ajax
http://www.cssplay.co.uk/menus/tutorial.html
http://www.destraynor.com/serendipity/
http://ajaxcookbook.org
http://www.ajaxload.info
http://ajaxtags.sourceforge.net/
http://sixrevisions.com/ajax/ajax_techniques/
http://editinplace.org/
http://www.phpbuilder.com/columns/ben_robinson20061207.php3
http://www.roscripts.com/September_-_Ajax_tools_of_the_month-182.html
http://nerd.metrocat.org/2006/04/ajaxy-goodness
http://www.phatfusion.net/
http://jquery.com/demo/thickbox/
http://www.chazzuka.com/blog/
http://www.dynamicdrive.com
http://www.tutorialized.com/

دمتم بود

أثناء نشر هذه التدوينة الحمدلله أنا مبسوووط جداً جداً جداً جداً (إلى مالا نهاية) … ولازم أستغل هذه الفرصة بحمدلله كثيراً وشكره على نعمته الي متفضل فيها عليّ (الحمدلله يا رب) …

الحقيقة إنه صارلي تقريباً أربعة شهور تقريباً وأنا حايس وبسبح في مشروع توكلت مهامه لي بأكمله وهذا المشروع بعتبره عمل جبار بالنسبة لي… بصراحة مشروع وسّع وفتّح الأبواب لي في مجال عملي واللغات اللي بشتغل عليها و اللي كنت حابب إني أتعلمها باحترافية (أعتذر عن كلمة احترافية ولكن بقدر أقول بالنسبة للي بأحتاجه منها في مجال عملي) … بجد الفضل لله أولاً ثم لمديري الغالي اللي وكل لي هذه المهمة و إن شاء الله إني أكون رفعت راسه و أبسطته بشغلي ولو إنه مرت عدة مواقف انجلط مني فيها لكن بجد أنا بعتذر عن كل هزة بدن هزيتك إياها… وتبريري الوحيد إنه الواحد إلا ما تمر عليه لحظات تقفل معاه الأخلاق و المخ … وكمان حابب أشكرك على سعة صدرك وتحملّك إلي …

مرت عليّ لحظات عصيبة جداً أثناء عملي بالمشروع (مش رهبة من البرمجة) لكن رهبة من التأخير بالتسليم … في شغلات كثير تعلمتها وكنت أعتقد زمان إني ما راح أوصل لهيك أشياء وكيف بتنعمل أو حتى لإيش بتستخدم… بجد أفتخر بإنجازي فيه الحمدلله…

لو بدي أكتب الأشياء اللي تعلمتها أثناء شغلي بالموقع ما راح أخلص لأنه بجد ضخم من حيث التعقيدات و الترابطات و التراكيب اللي فيه… لكن كل اللي بقدر أقوله الحمدلله

أعتذر من كل الشباب اللي ما حكيت لهم عن المشروع شو هو وشو اسمه… لكن لحاجة في نفس يعقوب قضاها لكن الآن ممكن أقول لكم عن المشروع اللي اشتغلته … صحيفة سبق الالكترونية

صحيح انقطعت فترة مش بسيطة عن التدوين و كمان ما كانت طلعاتي مع الشباب وكثرة الاعتذارات لهم عن الطلعة معهم وكمان اعتذرت لكثير من الشباب والصبايا عن مساعدتهم بمشاكلهم مع المدونات لكن والله بجد ما كنت قادر أجمع بشي غير هالمشروع … لدرجة والله وأنا نايم بحلم بالأكواد و حلول لمشاكل برمجية وكمان وقت قعدتي على التلفزيون أو وقت الاستحمام (عذراً بس هذا الحاصل معي).

على العموم أنا حبيت أخبركم باللي صار معي … وإن شاء الله إنه أرجع كما كنت في التدوين بمواضيعي الخفيفة اللي مالها علاقة بشي غير حياتي (العامة) و هواياتي والأشياء اللي بتستهويني

دمتم بود وراحة بال

اليوم وأنا على النت كالعادة بخبط وبلاطش بهالكمبيوتر كنت بدور عن كاركاتير لأبو محجوب عن جووجل إيرث .. مالقيته لكن لقيت خبر عن جد انصدمت لما قرأته

جوجل تعلن عن قرب نهاية جوجل ايرث

أعلنت شركة جوجل أنها ستطلق قمر صناعي جديد في 4 من شهر سبتمبر المقبل وسيحمل معه خدمة جديدة باسم جيو اي والتى من المنتظر أن تكون البديل الاكثر دقة ووضوح ومرونه من خدمة الجوجل ايرث

شو رايك يا أرطبون ؟؟

وكمان اليوم جووجل أعلنت عن دردشة الفيديو رسمياً و حطت الرابط فوق بأعلى الإيميل …. ونزلت التطبيق وكل اشي تمام التمام

برضو شو رايك يا أرطبون ؟؟

وزي ما بتعرفو إنه قبل يومين جووجل نزلت الـ (knol) المنافس لويكيبيديا … والداعم للغة العربية … هل تتوقعو إنها تحكي لويكيبيديا مع السلامة يا ويكيبيديا إنتي الحلقة الأضعف؟؟ أنا توقعاتي راح يصير هالحكي …

فشو رايك يا أرطبون ؟؟

في كمان شغلة اليوم بالصدفة جربتها وعجبتني جداً …. فتحت الماسنجر تبع gmail وفتحت على اسم يوسف أخوي وضغطت على (send voicemail) وسجلت مكالمة وانا مش متوقع انه يصير اشي … بعد ثواني وصلت رسالة على ايميل يوسف إنه أنا باعت له رسالة صوتية بصيغة mp3 محملة مع الرسالة ..

جربها يا أرطبون وقلي شو رايك برضو ؟؟؟

…………..

قريباً راح أعلن عن ما أشغلني الفترة الماضية بإذن الله ..

دمتم بود وخير وخدمات جووجل