ذكرياتي مع التعليم
واجب تدويني من الأخت (فيميل حفظها الله) عن الذكريات مع المرحلة التعليمية :
1- أفضل مرحلة تعليمية درستها ؟
المرحلة الجامعية – ومن أيام المدرسة ثاني ثانوي.
2- أسوأ مرحلة تعليمية مرت عليك ؟
الثانوية و بالتحديد ثالث ثانوي.
3- أفضل المدرسين اللي مروا عليك ؟
من الجامعه: د. سعادة سعادات ، بروف. علاء الحمامي ، بروف. مظفر الجرّاح ، د. قاسم خرما.
ومن المدارس : في مدرسين كثير بس والله ناسي أسمائهم.
4- أحب المواد اللي درستها ؟
في الجامعة: المحاسبة و برمجة الانترنت – غيرها ما بتذكر إني كنت أحب مواد الجامعة لأنه أغلبها كان رياضيات.
في الثانوية كنت أحب الفيزياء – عشان مدرسها كان كثير شبابي معنا فحببنا في المادة كثير عدا عن شرحه الرائع أيامها.
5- أكره المواد اللي مرت عليك ؟
من المرحلة الجامعية : الرياضيات بجميع مسمياتها والإدارية و المواد اللي ما الها علاقة بتخصصي (مواد اختياريه).
من المراحل الدراسية : الكيمياء و الأدب.
6- آخر شهادة علمية حصلت عليها , وتخصصك ؟
بكالوريوس ، أنظمة معلومات حاسوبية .
7- أطرف موقف مر عليك في دراستك ؟
الطرائف كثيرة جداً …. بس أول موقف ما بنساه طول الدهر …
أول ما والدي سجلني بالمدرسة الابتدائية ما كنت مقتنع إنه أنا راح أغيب عن والدتي مدة طويلة … فلما سجلني و كان موجود بالمدرسة معي كنت مطمأن و كانو المدرسين يوزعو علينا الفش فاش و الشيبس و العصيرات (أيام السن توب 
) المهم روّح والدي على البيت و أنا ضليتني مرتعب من المدرس اللي قدامي بما إنه غريب و كبير بالعمر … المهم بكيت وقتها من الخوف فإجى المدرس و نزل لمستواي الطولي 🙂 وصار يسألني و يهدي فيي و أنا من شدة الخوف عليت صوتي عليه (ما بدي أدرس عندك) ومالقي إلا هذا الكف المخمس على وجهه و طلعت من الصف و رحت على الصف الثاني لقيت مدرس الله يستر عليه (كانت بشرته سمرا كثيييييييير) و الله لا يوريكم منظري هذاك اليوم لما تمعنت فيه والمشكلة انه قعدني اول واحد بالصف … المهم صرت ابكي بشدة من الخوف وهو وقف قدامي و من خوفي طلعت فوق الطاولة وبهذاك المخمس الثاني على وجهه و طلعت اشرد من الفصل و رحت على الفصل اللي بعديه و كان المدرس ملتحي و لحيته طويلة فلما دخلت وقرب عليّ حط ايده فوق راسي و سألني ايش اسمك يا بطل ؟؟ وأنا بتمعن باللحية أول مرة أشوف لحية طويلة عن قرب 🙂 …. و بإيدي الثنتين ضليني أشد في لحيته و هو يقولي فك يا حبيبي و بعديها وطلعت من الفصل و معي شنطتي و بهدد فيهم والله ماني دارس عندكم و روحت على البيت (أصله المدرسة كانت جنت البيت مباشرة) ففتح لي أبوي الباب مالك يا سامي روحت من المدرسة … فجاوبته بكل ثقة إنه ضربت المدرسين كف و مزّيت (شديت) دقن مدرس و روحت …. فاستقبلني والدي العزيز استقبال حار جداً بشبشب الحمّام (الله يعزكم) وين يا سامي مكان ما بيوجعك …. هههههههههههه أكلت ضرب من أبوي ووزعت على الجيران ومن اليوم الثاني وأنا زي التوتو طالب مجتهد في المدرسة …
بس برضو ما كنت مقتنع إنه أخوي وليد (كان يدرس معي بنفس المدرسة بصف رابع) اللي بلعب معاه برة المدرسة إنه يكون بصف و أنا بصف ….. فأول أسبوع داومت بصف رابع جنب أخوي وليد …. و كان مدرسه كل يوم يجيب لي فش فاش و سن توب و بسكوت لاش و شيبسات أخرى … و أنا الوحيد اللي كنت أكل بالفصل و باقي الطلاب مستمتعين بالحصة و بصوت أكياس الشيبس و الأكل تبعي ههههههههههههههههههه ..
وثاني أسبوع داوم وليد معي في صفي أولى ابتدائي لحد ما اخذت على الوضع وبعدها رجع على صفه ….
8- أصعب موقف مر عليك في دراستك ؟
لما رسبت في الجامعه بآخر ترم في مادة نظم تشغيل على 10 علامات و خلوني ترم كامل على مادة واحدة أو بالأصح 10 علامات ..
وسلامتكم
هأمرر الواجب للي حابب يحل الواجب …